Жя Жанкэ

贾樟柯 (Jia Zhangke)

1970

Найруулагч

Намтар

Жя Жанкэ Хятадын зургадугаар үеийнхний хамгийн том төлөөлөгч, толгойлогч нь юм. Тэрээр 1970 онд Шанши мужийн Фенянь хотод төрсөн ажээ. Жягийн эхний гурван кино нь Хятадын киноны системээс гадуур хийгдсэн өөрийнх нь төрсөн муж Шаншигийн тухай кинонууд байдаг юм. Ийнхүү Хятадын албан ёсны кино үйлдвэрлэлээс гадуур хийгдсэн учраас андерграунд (олон нийтийн бус) кинонууд гэж болно.

2004 онд Хятадад Жя Жанкэгийн нэр хүнд өсөж эхэлсэн юм. Учир нь тэрээр дөрөв дэх бүрэн хэмжээнийхээ киног Хятадын засгийн газрын зөвшөөрөлтэй хийх эрхтэй болсон билээ. Жя уг нь Таюун дахь Шаншигийн урлагийн сургуульд сурдаг байсан бөгөөд нэгэн удаа Чэнь Кайгегийн “Шар хөрст өндөрлөг” киног үзсэн гэдэг. Энэ нь Жягийн хувьд амьдралыг нь бүрмөсөн өөрчлөх нөлөө үзүүлсэн бөгөөд Жя шууд л кино найруулагч болъё хэмээн шийдсэн байдаг.

Удалгүй 1994 онд Жя Бээжингийн Киноны академид тэнцэж кино урлагийн онолын мэргэжлээр суралцаж эхэлсэн ажээ. Жя 1995 онд өөрийнхөө хоёр дахь богино хэмжээний кино “Шиао Шан гэртээ харьсан нь” хэмээх бүтээлээ хийсэн нь олон нийтийн анхааралд түүнийг өртөхөд хүргэсэн байна. Жя энэ киногоо өөрийнх нь карьерийг эхлүүлж, тодорхойлж өгсөн кино гэж үздэг. Энэ кино нь Хонг Конгийн олон улсын богино хэмжээний кино наадмын хамгийн дээд шагналыг хүртэж байсан юм. Жя энэ наадам дээр олон хүмүүстэй танилцсаны дотор түүний эхний бүрэн хэмжээний кинон дээр ажиллах ирээдүйн багийнхнаа эндээс бүрдүүлсэн гэж хэлж болно. Жя төгсөхөөсөө өмнө бас нэгэн богино хэмжээний кино хийсэн нь олон нийтэд түгээгүй, Жягийн хэлснээр зүгээр л “туршилт” байсан байна.

Жя төгсөөд эхнийхээ бүрэн хэмжээний кино болох “Шиао Ву” (1997)-г Хятадын киноны системээс гадуур хийсэн байна. Энэ кино нь өөрийнх нь төрсөн хот Феняньд болох бөгөөд халаасны хулгайчийн тухай өгүүлдэг ажээ. Жя энэ киногоо Хятадын тавдугаар үеийнхний киноны утга агуулга өдөр тутмын амьдралаас холдож түүхэн тал руу хазайж буй байдлыг эсэргүүцсэний үндсэн дээр бүтээсэн гэдэг.

Энэхүү кино нь олон улсын кино наадмуудад олны анхаарлыг татаж эцэст нь Такеши Китаногийн анхааралд өртжээ. Жя 2000 онд хөдөө тосгоны бүжиг, хөгжмийн бүлгэмийн 1970-с 1990-ээд он хүртэлх түүхийг харуулсан “Тайз” киногоо бүтээсэн нь зургадугаар үеийнхний титэм бүтээл хэмээн тооцогддог билээ. 2002 онд Жя анхныхаа дижитал видеогоор авсан кино “Үл мэдэгдэх таашаал” киногоо хийсэн байна. Энэхүү Жягийн эхний гурван киног нь Хятадын хуучин үеэс орчин үе рүү шилжсэн шилжилтийг шүүмжилсэн трилоги гэж үзэх нь бий.

2004 онд Жя “Дэлхий” киногоо Хятадын засгийн газрын зөвшөөрөлтэйгөөр хийсэн юм. Жя-д засгийн газрын зөвшөөрөл өгсөн нь түүний билгийн мэлмийг булингартуулаагүй бөгөөд “Дэлхий” кино нь гадаадын болон Хятадын шүүмжлэгчдээс сайн үнэлгээ авсан юм. Жя 2006 онд “Натюрморт” киногоо мөн л дижитал камераар авсан бөгөөд Венецийн кино наадмаас том шагнал Алтан арсланг хүртэж байсан билээ.

Жягийн киноны хэв маяг нь удаан авсан зураг авалт, минималист, реалист арга барилаар нь илэрдэг. Жя кинонууддаа ихэвчлэн Хятадын орчин үеийн залуучуудын төөрөгдөл, даяарчлал, орчин үеийн хөгжлийн сөрөг талыг харуулдаг билээ. Тавдугаар үеийнхний кино найруулагчид Хятадын амьдралыг илүү романтик (оргилуун) хэлбэрээр хүлээн авч түүнийгээ кинонууддаа илэрхийлдэг бол Жя баримтат кинон дээр л гарч ирэх үнэн бодит байдлыг урлагтай холбож чаддагаараа онцлогтой юм.

Тавдугаар үеийн найруулагчид хэдий нилээн өөрчлөгдөж, илүү түүхэн хэлбэрийн тулааны урлагийг харуулсан, олон улсад ашиг орлого олох боломжтой кино хийх болсон нь зургадугаар үеийнхэнтэй ялангуяа Жягийн арга барилтай зөрчилддөг.

Жя бүрэн хэмжээний уран сайхны кинонууд дээр ажиллахаас гадуур олон богино хэмжээний болон бүрэн хэмжээний баримтат кинонууд хийж байсан билээ. 2010 оны эхээр Жя Хонг Конгийн кино найруулагч Жонни Тогийн продюсероор нь ажиллах “Чин гүрний үед” хэмээх асар том хэмжээний төсөл дээр ажиллаж эхэлсэн байна. - Ike Cinecult

Уран бүтээл

Тавцан (2000)
зохиолч, найруулагч
Үл мэдэх таашаал (2002)
зохиолч, найруулагч
Хорвоо (2004)
зохиолч, найруулагч
Натюрморт (2006)
зохиолч, найруулагч
Нүгэлт санаачлага (2013)
гүйцэтгэх продюсер, зохиолч, найруулагч
К (2015)
гүйцэтгэх продюсер, продюсер

Самбар — 0 сэтгэгдэл байна

Сэтгэгдэл бичихийн тулд нэвтрэн орох хэрэгтэй.