Роман Полански

Roman Polanski

1933

Найруулагч

Хүчирхийлэл бодит амьдрал дээр ямар байдаг вэ, яг л тэр чигээр нь үзүүлэх хэрэгтэй. Үгүй бол ямар ч ёс суртахуунгүй үйлдэл болно. Хүмүүст эвгүй мэдрэмж төрүүлэхгүй л бол хуурамч хүчирхийлэл үзүүлэх нь ичгүүргүй, булай хэргээс ялгаагүй.

Намтар

1933 онд Парист мэндэлсэн польш хүү Ражмунд Роман Лиеблингийн дэлхийн кино урлагийн түүхэн дэх хамгийн гайхалтай найруулагчийн нэг Роман Полански болсон зам үнэхээр сонирхолтой. Тэрээр аль багаасаа л урлагийн олон төрөл, олон өвөрмөц хэл соёлын дунд хүмүүжжээ.

Түүний еврей гаралтай польш аав нь зураач, барималч нэгэн байлаа. Харин ээж нь еврей эцэгтэй, католик ээжтэй орос эмэгтэй байв. Романыг дөрвөн настай байхад тэднийх Польш руу нүүсэн ч бахархал нь байсан еврей угсаа Поланскийн гэр бүлд гай авчирчээ. 1939 оны арваннэгдүгээр сарын 13-нд нацистууд Польшийн Краков хотыг эзэлж, Поланскийнхныг хорих лагерьт аваачсан байна. Найман настай Роман хүү хорих лагераас оргож сайхан сэтгэлт фермер өвгөнийд толгой хоргодож байгаад азаар амьд үлдсэн аавтайгаа дайны дараа уулзсан байна.

Харин эгч, ээж хоёр нь нацистуудын тамлалыг даваагүй аж. Тэрээр өнөөг хэр нь дайн хийгээд хорих лагерийн тухай дурсах дургүй байдаг бөгөөд хожим дэлхийд данстай найруулагч болсныхоо дараа ч еврей нарын тухай кино бүтээх олон саналаас татгалзаж байжээ. Алдарт “Шиндлерийн бүртгэл” киног найруулах санал түүнд удаа дараа ирэхэд тэрээр “Миний сэтгэлийн шарх одоо хэр аниагүй. Хожим болсон бүхнийг түр ч атугай мартаж, сэтгэлээ тайтгарахаар би амиа алдсан тэдгээр гэмгүй хүмүүсийн тухай өөрийнхөө киног бүтээх болно” гэж байв.

Р.Полански 2004 онд хэлсэн ёсоороо өөрт хамгийн хүндээр тусдаг сэдэв болох еврей нарын хувь заяаны тухай “Төгөлдөр хуурч” киног бүтээсэн нь санаанд оромгүй их амжилт олсон билээ. Харин энэ нь түүний дурсах дургүй ганц сэдэв биш. Ээж, эгчээ цаг бусаар алдсан тэрээр дахин хагацал үзсэн юм. 1959 онд Польшийн Лоз хотод Кино урлагийн их сургууль төгссөн Р.Полански тухайн үеийн коммунист засаглалт Польшийн үзэл сурталд харшлах “Усанд туссан хутга” (1962) киногоо бүтээсний дараа хараа хяналтгүй, сэтгэхүйн уран бүтээлээ туурвихаар ардчилсан нийгэмт, чөлөөт ертөнц гэгдэх Англи, Америкийг зорьжээ.

Тэрээр Лондон хотноо “Аймшиггүй цус сорогчид” киноныхоо зураг авалтын үеэр жүжигчин Шэрон Тейттэй дотносож, 1968 оны нэгдүгээр сарын 25-нд Лондон хотноо хуримласан байна. Хэдэн сарын дараа шинэхэн хос алдарт “Роүзмэригийн хүүхэд” киноны зураг авалтаар Америкийг зорив. Энэхүү киногоор Р.Полански хоёр дахь удаагаа “Оскар”-ын шагналд нэр дэвшсэн юм. Шинэ киноны амжилт, гэр бүлийн аз жаргал нь гэвч удаан үргэлжилсэнгүй. Р.Поланскийг Лондон руу ажлаар явсан хойгуур 1969 оны наймдугаар сарын 9-нд түүний найман сартай жирэмсэн эхнэр Шэрон нь бусдын гарт амиа алджээ.

Өөрсдийгөө Мэнсоны гэр бүл гэдэг бүлэг дээрэмчид найруулагчийн гэрийг дээрэмдэхээр ороод Р.Поланскийн эхнэрээс гадна байшинд байсан гурван эрэгтэй, нэг эмэгтэйг хороосон юм. Хөл хүнд Шэрон хүүхдээ хамгаалах гэж алуурчидтай эцсээ хүртэл тэмцсэн бөгөөд алуурчид түүнийг хэрцгийгээр тамлан хэд хэдэн удаа хутгалж, амь тавьсных нь дараа цусаар нь “гахай” гэж ханан дээр бичсэн гэдэг. Р.Полански дахин шантрав. Тэрээр эхнэртэйгээ холбоотой бүхнийг хаяж, хэдэн сар гэртээ бүгжээ. Хожим “Поланскийн роман” нэртэй дурдатгал номдоо тэрээр эл эмгэнэлт явдлын тухай “Түүнийг минь санагдуулах бүхнийг харах надад үнэхээр хэцүү байсан. Би одоо хэр өглөө болгон сэрэхдээ тэр өдөр гэртээ байхгүй яав даа гэж харамсдаг” гэжээ. Тэрээр үзэсгэлэнт бүсгүйн тухай “Тэсс” киногоо эхнэрийнхээ гэгээн дурсгалд зориулсан юм.

Р.Поланскийн ээдрээтэй амьдрал цаашдаа мөн л хүнд хэцүү бүхнээр дүүрэн байлаа. 1977 онд 44 настай түүнийг 13 настай охин хүчирхийлэх гэж завдсан гэж эрүү үүсгэжээ. АНУ-д жуулчны визтэй байсан Р.Поланскийг баривчлах шийдвэр гарав. Охины эх өөрийг нь гүжирдсэн гэж мэдэгдсэн Р.Полански 1978 оны хоёрдугаар сарын 1-нд хэдий харь ч төрсөн нутаг болох Франц руу зугтлаа. Францын иргэн түүнийг АНУ Францын талаас шаардах эрхгүй байв. Тэрээр хэдий польш гаралтай ч Францаас өөр улсын иргэн байсангүй. Р.Полански польш, орос, англи, франц, испани, итали хэлээр ярьдаг. 1978 он хүртэл бүтээсэн түүний есөн киноны хоёрынх нь л зураг авалт АНУ-ын нутагт болжээ. Р.Полански одоо хүртэл Америкийн нутагт хөл тавиагүй бөгөөд түүнийг 50 жил хорих ял өнөө хэр нь хүчинтэй байгаа. “Төгөлдөр хуурч” киногоороо хүртсэн түүний шилдэг найруулагчийн “Оскар”-ыг дотны анд, жүжигчин Харрисон Форд нь Парис хотод хүргэж өгчээ.

Р.Поланскийн кино бүр өвөрмөц өнгө, шийдэлтэйгээс гадна хэний ч сэтгэлийг татахаар амьдралд ойр бодит өгүүлэмж сайтай гэж мэргэжилтнүүд үздэг. Ээдрээтэй амьдралыг туулсан өвгөн найруулагч өнөө хэр нь хөдөлдөг уран зураг мэт өвөрмөц бүтээлээ туурвисаар явна.

-"Үнэн" сонин

Уран бүтээл

Жигшил (1965)
зохиолч, найруулагч
Мухардал (1966)
зохиолч, найруулагч
Макбет (1971)
зохиолч, найруулагч
Хятад хороолол (1974)
зохиолч, найруулагч
Түрээслэгч (1976)
жүжигчин, найруулагч
Тэсс (1979)
найруулагч
Намтар бичигч (2010)
зохиолч, найруулагч, продюсер
Хядлага (2011)
зохиолч, найруулагч

Самбар — 0 сэтгэгдэл байна

Сэтгэгдэл бичихийн тулд нэвтрэн орох хэрэгтэй.