Турк гаралтай Германы залуу найруулагч Мехмет Акиф Буфкаталайн анхны бүрэн хэмжээний кинонд өөрийн шашны итгэл, эрээн бараан амьдралын нугачаанд хөлөө олохгүй төөрч буй залуусын тухай өгүүлнэ. Шашны хуульдаа үнэнч үлдэх үү, эсвэл сэтгэлээ дагах уу?

Есөн настай огцом ууртай Бенни охин Германы хүүхэд хамгааллын үйлчилгээний авч болох бүх асрамж үйлчилгээг авдаг. Заримдаа элдэв систем, тогтолцоо гэхээсээ илүү хүнд хүнээ гэсэн хайр халамж, тэр хүнийг ойлгох сэтгэл л хэрэгтэй байдаг. 69 дэхь удаагийн Берлиний кино наадмаас Мөнгөн баавгайг Альфред Бауэрын нэрэмжит шагналаар хүртэхийн сацуу 92 дахь удаагийн Оскарын кино наадмын Шилдэг гадаад хэлээрх кино төрөлд нэр дэвших өрсөлдөөнд улсаа төлөөлөн шалгарсан байна.

10 жилийн тэртээ шилдэг борлуулалттай роман бичиж байсан зохиолч бүсгүй Сибил сэтгэлзүйн зөвлөгөө өгдөг ажлаа орхихоор шийдэж дахин бичих хүсэлдээ автана. Зохиол бүтээл бичих эрчим нь түүний өнгөрсөн харилцааг нь хором бүр сануулна. Ер нь энэ кино бүхэлдээ л эмэгтэй хүмүүст учран байх сэтгэлийн хөндүүр, зовнил, шаналанг тойрог хэлбэрээр харуулчихна.

Хятадын Сычуань мужийн бөглүү тосгонд уламжлалт дуурийн хэсэг дуучид хамтдаа тоглолт хийж, цугтаа амьдраад арван жилийг үджээ. Устаж мартагдахын босгонд тулсан уламжлалт дуурийн урлагт зүрх сэтгэлээ өгсөн бүсгүй театрын үйл ажиллагааг ахална. Гэтэл хуучирч муудсан театрын барилгыг нь буулгах тухай сануулга бичиг ирснээр, театраа аварч үлдэх хүндхэн үүрэг ахлагч бүсгүйд ноогдоно. 

Всеволод Пудовкиний "Шатрын халуурал" киног үзээд бичсэн "кино эссе". Мууранд дуртай бол энэ киног үз. Шатард дуртай бол бас үз. Инээх дуртай бол бүр ч үз.