Холбооны тухай

"Алтан хальс" холбоо нь сонгодог болон артхаус киног олон нийтэд таниулах зорилготой төрийн бус байгууллага юм.

"Алтан хальс холбоо" 2009 оноос бямба гараг бүр "Dreamers' Day" кино өдөрлөгийг зохион байгуулж, 2011 оноос "artfilm.mn" анхны монгол хэл дээрх арт киноны нэвтэрхий толь вебсаитыг удирдан ажиллуулж байна. 2013 оноос хойш "Алтан хальс олон улсын кино наадам"-ыг зохион байгуулж ирэв. 

Монголын кино уран бүтээлчид ихэвчлэн арилжааны кино хийх болсон энэ эрин үед хойч үеийн уран бүтээлчид маань кино урлагийн түүхнээ мөнхлөгдсөн шилдэг найруулагчдын киноноос суралцах хэрэгтэй гэж бид итгэдэг.

Арт кино үзэж боловсорсноор шинэ үеийн залуус Монгол хэл, түүх, соёл, сэтгэлгээний чадлыг дэлхий дахинаа тунхаглах урлагийн бүтээл туурвих хөрс суурийг тавихад бага ч гэсэн хувь нэмэр оруулах нь бидний зорилго.

Ямарваа нэгэн дэлхийд кино урлагаараа танигдаж амжаагүй үндэстний уран бүтээлчид шууд сайн чанарын артхаус кинонуудыг богино хугацаанд хийж хүч түрэн гарч ирэх нэг боломж бий. Мөнгө, санхүүжилт ихээхэн зарлагадаж хийгдсэн арилжааны киногоор Монголыг таниулахаас илүү чадалтай цөөн найруулагчдын ачаар кино урлагийнх нь үнэ цэнэ дэлхий дахинаа хүндлэгдсэн байдалтай Иран, Румынь, Тайланд, Казахстан зэрэг орнууд нь үүний тод жишээ юм.

Бид арт кино хийж чадахуйц чадалтай, мэдлэгтэй, мэдрэмжтэй хойч үеийн залуусыг бүхий л боломжит байдлаар ч болов бэлдэхийг зорьж буй нь бид бүхний үйл ажиллагаанаас тодорхой харагдах болно.

2011 онд "Европын холбооны кино наадам"-ыг Монгол Францын төвтэй хамтран зохион байгуулав. 
2012 - 2019 онд "Франц хэлтэн орнуудын кино наадам"-ыг Монгол Францын төвтэй хамтран зохион байгуулав.
2013 онд "Герман Франц кино наадам"-ыг Гёте Институт, Монгол Францын төвтэй хамтран зохион байгуулав. 
2013 оноос хойш өнөөг хүртэл "Улаанбаатар олон улсын кино наадам"-ыг Монголын урлагийн зөвлөлтэй хамтран зохион байгуулж байна. 
2013 - 2018 "Алтан хальс олон улсын кино наадам"-ыг санаачлан, зохион байгуулав. Өнгөрөгч хугацаанд "Монголын андерграунд кино уралдаан", "Монголын андерграунд кино наадам", "Golden Reel International Underground Film Festival", "Altan Khalis Independent Film Festival" зэрэг нэрээр зохион байгуулж байв.  
2017 оноос "German Films at Dreamers' Day" - Герман киноны өдөрлөгийг сар болгон Гёте институттэй хамтран зохион байгуулж байна. 
2018 оноос "Czech Films at Dreamers' Day" - Чех киноны өдөрлөгийг сар тутамд Бүгд Найрамдах Чех Улсын элчин сайдын яамтай хамтран зохион байгуулж байна.